மாநிலங்களவையில் எழுந்த கடும் எதிர்ப்பின் காரணமாக முத்தலாக் தடுப்பு மசோதா நிறைவேற்றப்படாமலேயே நாடாளுமன்றத்தின் குளிர்கால கூட்டத் தொடர் முடிவடைந்திருக்கிறது.
அடுத்தமாதம் கூடும் பட்ஜெட் தொடரில் மீண்டும் விவாதிக்கப்படும். ஆனால் மசோதாவை நிறைவேற்ற போதுமான பெரும்பான்மை ஆளும் பாரதீய ஜனதாவிற்கில்லை. பல்வேறு திருத்தங்களை காங்கிரஸ் கோருகிறது. அவை குறித்து விவாதிக்க தனிக் குழு ஒன்று அமைக்கவேண்டுமென அதுவும் இன்னும் வேறு சில கட்சிகளும் வலியுறுத்துகின்றன.
முஸ்லீம்களைக் குறிவைப்பதில் பாஜக சற்று அதிக தூரம் சென்றுவிட்டதோ என்றஞ்சி கூட்டணிக்கட்சிகளே ஆதரிக்கத் தயங்குகின்றன. பாஜகவின் பெரும்பாலான நடவடிக்கைகளில் துணை நிற்கும், தெலுகு தேசம் கட்சியே இந்த விவகாரத்தில் பிஜேபிக்கு எதிராக நிற்கிறது. எனவே பட்ஜெட் தொடரில் மசோதாவை முழுமையாக ஆராய தனிக் குழு அமைக்கப்படக்கூடும் என்றே கருதப்படுகிறது. அப்படிக் கொண்டுவரப்பட்டால் முஸ்லீம், மற்றும் மதச்சார்பற்ற அமைப்புக்களும் சிந்தனையாளர்களும் அக்குழுவின் மீது அழுத்தம் கொண்டு வந்து, முஸ்லீம் சமுதாயத்திற்கு பாதகமான அம்சங்களை நீக்கவைக்கலாம் என நோக்கர்கள் கருதுகின்றனர்.
சரி இந்த சட்ட வரைவு உண்மையில் முஸ்லிம் பெண்களை பாதுகாக்குமா?
“எனது ஆறு ஆண்டு திருமண வாழ்க்கையில் மூன்று குழந்தைகளுக்கு தாயாகிவிட்டேன். ஆனால் இப்போது கணவருடன் வாழவில்லை . ”
முகத்தில் எந்தவித உணர்ச்சியையும் காட்டாமல் இதைக் கூறுகிறார் 27 வயது ரேஷ்மா (பெயர் மாற்றப்பட்டுள்ளது). வருத்தமோ, ஆத்திரமோ எந்த உணர்ச்சியும் இல்லாமல் இதை ஒரு தகவலாக தெரிவிக்கும் அவரின் முகத்தில் எதிர்காலம் பற்றிய கவலை படிந்து போயிருக்கிறது.
கணவரை ரேஷ்மா விலக்கினாரா? கணவர் அவரை ஒதுக்கினாரா? இந்தக் கேள்விக்கு எதிர்கேள்வி தொடுக்கும் அவர், “இரண்டிற்கும் எதாவது வித்தியாசம் இருக்கிறதா என்ன? ஆனால் அவர் இதுவரை எனக்கு தலாக்கும் கொடுக்கவில்லை” என்கிறார்.
தலாக் கொடுப்பது ஒரு விதத்தில் இஸ்லாமிய பெண்களுக்கு பிரச்சனையை ஏற்படுத்துகிறது என்றால் தலாக் கொடுக்காமல் கணவன் பிரிந்து வாழ்வதும் வேறுவிதமான சிக்கல்களை ஏற்படுத்தும் என்பதற்கு உதாரணமாக மேலே ரோஷ்மா போன்றோரின் வாழ்க்கை சூழல்!
இப்படி பல முஸ்லிம்பெண்கள் திருமண உறவை இழந்து முழுமையாக கணவனால் பழிவாங்கபட்டு வாழ்கிறார்கள்
ஆனால் புதிய சட்டத்தின்படி முஸ்லீம் பெண்களின் பாதுகாப்பு முழுமையாக உறுதி செய்யப்பட்டிருக்கிறதா?
இஸ்லாமிய விவாகரத்து நடைமுறையான முத்தலாக் அங்கீகாரமற்றது என உச்ச நீதிமன்ற அரசியல் சாசன அமர்வு சமீபத்தில் தீர்ப்பு வழங்கியது. முத்தலாக் முறை தொடர்பாக மத்திய அரசு ஆறு மாதங்களுக்குள் சட்டம் இயற்றவேண்டும் எனவும் அறிவுறுத்தியது. இதுதான் மோடி அரசின் முத்தலாக் சட்டத்திற்கான முதல் சுழி.
யூனிபார்ம் சிவில் கோட் என்பது குறித்து பிஜேபி பல ஆண்டுகளாக பேசியே வந்திருக்கிறதுதான் என்றாலும், உச்சநீதிமன்றத்தின் இந்தத் தீர்ப்பு, அதன் பணியை சுலபமாக்கியது.
அவசரகதியில் இந்த மசோதாவை தயாரித்திருப்பதாக மத்திய அரசு மேல் குற்றம் சுமத்தும் வழக்கறிஞர் இந்திரா ஜெய்சிங், “நீதிமன்றத்தில் முத்தலாக் பற்றிய விவாதத்தின்போது, முஸ்லிம் பெண்களுக்கு சம உரிமை கொடுப்பது மற்றும் மரியாதையை பெற்றுக்கொடுப்பது பற்றி பேசப்பட்டது. ஆனால், மத்திய அரசோ, தலாக் கூறி விவாகரத்து செய்யும் கணவனை சிறைக்கு அனுப்புவதாக முடிவெடுத்தால், திருமணம் என்ற பந்தமே நிலைக்காது. பிறகு எங்கிருந்து உரிமையும், மரியாதையும் கிடைக்கும்?” என்று நிதர்சனத்தை கேள்விக்கணையாக தொடுக்கிறார்.
ஒருபக்கம் முத்தலாக் செல்லாது என்பதும், இன்னொரு புறம் தலாக் கூறிய கணவன் ஜீவனாம்சம் வழங்கவேண்டும் என்று சொல்வதும் அபத்தத்தின் உச்சம். விவாகரத்து செல்லாது என்றால், திருமணம் தொடர்கிறது என்றால் எதற்காக ஜீவனாம்சம்?
முத்தலாக் மூலம் விவாகரத்து செய்யப்படும் பெண்ணிடமே, மைனர் குழந்தைகளின் பொறுப்பு ஒப்படைக்கப்படும், கணவனை சிறைக்கனுப்பினால் மனைவி என்ன செய்வார் தன் குடும்பத்தை பராமரிக்க ? சிறைக்குச் செல்லும் கணவர் எப்படி ஜீவனாம்சத்திற்கான நிதி ஆதாரத்தை திரட்டமுடியும்?
முத்தலாக்கை எதிர்த்து சட்ட உதவியை எதிர்பார்க்கும் பெண் கணவருடன் வாழ்வதற்காகவும், பொருளாதார பாதுகாப்புக்காகவுமே நீதிமன்றத்தின் ஆதரவை நாடுகிறார். ஆனால் கணவனை சிறைக்கு அனுப்பினால் அந்த பெண்ணுக்கு தேவைப்படும் இரண்டு அடிப்படை ஆதரவுமே கேள்விக்குறியாகிவிடும். முத்தலாக் தடையால் அப்பெண்ணின் மறு வாழ்வும் தடைபடுகிறது
சிறையில் இருக்கும் கணவர் அல்லது கணவரின் குடும்பத்தினர் அல்லது அரசு என யார் ஜீவான்ம்சம் கொடுப்பார்கள் என்பது தெரியாமல் ஜீவனாம்சத்தை எப்படி நிர்ணயிப்பது? இந்த ஜீவனாம்சம் எத்தனை மாதம்,வருடம் எவ்வளவு தரவேண்டும் ? இத்தகைய எண்ணற்ற கேள்விகளுக்கு மோடியின் மசோதாவில் எந்த விளக்கமும் இல்லை.
முத்தலாக் மூலம் விவாகரத்து செய்யப்பட்ட பெண்ணின் ஜீவனாம்சம் பற்றி நீதிபதியின் முடிவே இறுதியானது.
இவைபோக கடும் விமர்சனத்திற்குள்ளாயிருப்பது முத்தலாக் சொல்லி விவாகரத்து செய்யும் கணவருக்கு மூன்றாண்டு சிறைதண்டனை என்ற விதிதான். முத்தலாக் ஜாமீனில் வெளிவர முடியாத குற்றமாகிறது. ஓர் அடிப்படைக் கேள்வி, திருமணம் சிவில் சட்டங்களின் கீழ்தான் வரும், அது தொடர்பான பிரச்சினை எப்படி கிரிமினல் வரையறைக்குள்ளாகும்?
மேலும் மனைவி என்றல்ல. எவர் வேண்டுமானாலும் ஒரு முஸ்லீம் கணவர் தன் மனைவி மீது தலாக் சொல்லிவிட்டார் எனப் புகார் கூறிவிட்டால், அந்தக் கணவரை போலீசார் கைது செய்து சிறையில் அடைத்துவிடலாம். இந்த ஷரத்துததான் இந்த மசோதாவின் நோக்கத்தையே சந்தேகத்திற்குள்ளாக்குகிறது. கணவன் மனைவிக்கு இடையே நடக்கும் ஒரு சிக்கலில், யார் வேண்டுமானாலும் புகார் தரலாம் என்பது எத்தகைய ஆபத்தான பிரிவு என்பதும், இந்த சட்டத்தை கொண்டு வருவது, வெளிப்படையாகவே இஸ்லாமியர்கள் மீது வெறுப்பை கக்கும் ஒரு கட்சி என்பதையும் மறக்க முடியாது.
கோரக்பூர் சாமியார் முதல்வராக இருக்கும் உத்திரபிரதேசத்தில் மட்டுமல்ல, பாஜக ஆளும் அனைத்து மாநிலங்களிலுமே இம்மாதிரியான கொடுமைகள் நாள்தோறும் நிகழும் வாய்ப்பு நிறையவே உண்டு. அந்த வகையில் இந்த புதிய சட்டம் முஸ்லிம் ஆண்களுக்கெதிரான சதி என்றால் அது மிகையில்லை.
இந்திய முஸ்லிம் மகளிர் அமைப்பின் தலைவர் ஜாகியா சோமன் புதிய வரைவு மசோதாவை வரவேற்கிறார். ஆனால் அதே நேரத்தில் இன்னும் சற்று மேம்பட்டு இருந்தால் நன்றாக இருக்கும் என்று அவர் கருத்து தெரிவித்திருக்கிறார்.
“குரானை அடிப்படையாகக் கொண்டு குடும்ப சட்டம் இயற்றப்பட வேண்டும். மத்திய அரசின் புதிய வரைவு மசோதாவை நாங்கள் வரவேற்கிறோம். ஆனால், முத்தலாக் சொல்லி விவாகரத்து செய்யும் உரிமை கணவன் மனைவி இருவருக்கும் இருக்கவேண்டும். மூன்று முறை தலாக் சொல்வதற்கான காலகட்டமும் 90 நாட்கள் என்பது உறுதி செய்யப்படவேண்டும். அதேபோல் நிகாஹ் ஹலாலா, பலதார மணம் பற்றியும் சட்டம் கவனத்தில் கொள்ளவேண்டும்.”
மேலும் “ஒன்றுக்கு மேற்பட்ட திருமணம் செய்து கொள்வது சட்டத்திற்கு விரோதமானது என்று அறிவிக்கப்படாவிட்டால், தலாக் சொல்லி விவாகரத்து செய்யாமலேயே ஆண் மற்றொரு திருமணம் செய்துகொண்டு, தண்டனையில் இருந்து தப்பிக்க வழி ஏற்படும்” என்ற அச்சத்தையும் வெளிப்படுத்துகிறார் ஜாகியா சோமன்.
உண்மை. இச்சட்டத்தினால் வருங்காலத்தில் இப்படிபட்ட நிகழ்வுகள் நிகழ அதிகபட்ச சாத்தியக்கூறுகள் உண்டு அது மட்டும் அல்லாது இது இறைவனின் சட்டம் இதை நாம் மறுக்கக்கூடாது என்ற மனநிலையை இஸ்லாமிய முல்லாக்கள் பாமர முஸ்லிம் பெண்களுக்கு ஊட்டி விட்டால் இப்பெண்கள் காவல் நிலையம் வந்து புகார் கொடுக்கக்கூட இறையச்சம் கொள்ளும் நிலை உருவாகும். இப்படி நடக்கக்கூடிய வாய்ப்புக்கள் இருப்பதால்தான் மௌலவி பிஜே எனும் பி ஜைனுல் ஆபிதீன் (TNTJ) கூட இந்த சட்டத்தால் முஸ்லிம்களை ஒன்னும் செய்து விட முடியாது என்று மிதப்பாகக் கூறுகிறார்.
இந்த வரைவு மசோதாவில் ‘நிகாஹ் ஹலாலா’ (விவாகரத்து செய்து கொண்ட தம்பதிகள் மீண்டும் திருமணம் செய்து கொள்ளவேண்டுமானால், மனைவி வேறொரு ஆணை திருமணம் செய்துக் கொண்டு, அவரிடம் இருந்து விவாகரத்து பெற்று, அதன்பிறகு, முதல் கணவரை மீண்டும் திருமணம் செய்துக் கொள்ளுதல்), பலதார திருமணம், மற்றும் பிற வகை விவாகரத்து முறைகள் பற்றி எதுவும் குறிப்பிடப்படவில்லை. இந்த முத்தலாக் தடுப்புசட்டம் ஷியா ,அஹ்மதியா முஸ்லிம்களுக்கும் பொருந்துமா என்பதும் தெளிவாக இல்லை.
இஸ்லாமியர் நபிகள் நாயகத்தின் முஹம்மதின் வாழ்க்கை வரலாறும் முழுமையாக, சரியாக பதியபட்டிருக்கிறது என்று அவர்கள் உறுதியாக நம்புகின்றனர் முஹம்மதின் நரை முடிகளின் எண்ணிக்கை கூட அவர்கள் தங்கள் வேதத்தில் தெரிவிக்கப்பட்டிருக்கிறது என்கின்றனர்.
குரான் இறைவனின் கட்டளை வார்த்தை என்பதில் அசைக்கமுடியாத நம்பிக்கை. தங்கள் வாழ்க்கையின் ஒவ்வொரு கணத்தையும் அத் திருக்குரானில் கூறப்பட்டிருப்பவையே முடிவுசெய்யவேண்டும் என்கின்றனர்.
அந்த அளவிலே தலாக் நடைமுறைக்கு வருவதற்கும் ஆதாரம் வேண்டுமல்லவா?
நபிகளாரின் வளர்ப்பு மகன் ஸைத் இப்னு ஹாரிஸாவில் துவங்குகிறது இந்த தலாக் அலங்கோலம்.
ஹாரிஸா தன் முதல் மனைவி ஸைனைப் பின்த் ஜஹ்ஷ்ஷை தலாக் செய்கிறார். சரி அப்போது எப்படி தலாக் சொன்னார்? ஒரே முறையிலா அல்லது இடைவெளி விட்டு விட்டா? இடைவெளி விட்டு விட்டு என்றால், அதுவரை ஸைனப் யாருடைய வீட்டில் வசித்தார் ?
எத்தனை முறை இத்தா இருந்தார் ? இப்படி பல கேள்விகள் வருகிறது ஆனால் எக்கேள்விக்கும் குர் ஆனில் விடை இல்லவே இல்லை.
இஸ்லாமிய ஷரீஆவின் பரிபாஷையில் இத்தா என்பது விவாகரத்துப் பெற்ற பெண் அல்லது கணவனை இழந்த பெண் குறிப்பிட்ட காலம் திருமணஞ் செய்யாமல் காத்திருக்கும் காலத்தைக் குறிக்கும்.
தலாக் சொல்லப்பட்ட பெண் மூன்று மாதவிடாய் காலம் காத்திருப்பாள்.’ (2:228)
மாதவிடாய் ஏற்படாதவளாகவோ அல்லது அதில் இருந்து நிராசை அடைந்தவளாகவோ இருந்தால் அவள் மூன்று மாத காலம் வரை இத்தா இருப்பாள். (காண்க:- 64 : 4)
மாதவிடாய் வந்தாலும் மூணு மாதம் வராவிட்டாலும் மூணு மாதம் தான் !
அவள் கர்பிணியாக இருந்தால் தனது கருவில் உள்ள குழந்தையை பெற்றெடுக்கும் வரை இத்தாவில் இருப்பாள் – (65:4)
இத்தா குறித்து மேல் விவரங்கள் (http://www.islamkalvi.com/?p=4818)
(இது பொதுவாக கொடுக்கப்படும் விளக்கம். இவை குறித்து பல்வேறு கேள்விகள் எழுப்பலாம். கர்பிணியாக இருக்கும் போது ஒருவன் தலாக் கொடுக்கிறான் என்றால் அவன் எத்தகைய மனநிலை கொண்டவனாக இருப்பான் என ஆத்திரம் வரலாம். அந்த நியாய, அநியாயங்களுக்குள் செல்லாமல், இஸ்லாமறியாதவர்கள் தெரிந்து கொள்ளும் பொருட்டே இச் சுட்டி.)
இதையும் நோக்குங்கள். ஒருவர் தன் மனைவியைத் தலாக் கூறிவிட்டார். அவளது இத்தா காலமும் முடிந்துவிட்டது. அதன் பின்னர் அந்தக் கணவன் தான் விவாகரத்துச் செய்த பெண்ணுடன் சேர்ந்து வாழலாம் சேர்ந்து வாழவும் முடியும். ஆனால் அத்தகையதொரு முடிவினை எடுக்கும் உரிமை ஆண்களுக்கு மட்டுமே.
ஆண்கள் பெண்களை நிர்வகிப்போர் ஆவர்’ என்கிறது முஹம்மதின் குரான் (பார்க்க 4 : 34) இந்த ஒரு சொற்றொடரே முஹம்மதிஸம் பெண்கள் மீது எத்தகைய அடிமை விலங்கை பூட்டி வைத்துள்ளது என்பதை நமக்கு தெரியவைக்கும்.
இப்படித்தான் 1400வருடங்களுக்கு மேலாக முஸ்லிம் பெண்கள் முஸ்லிம் ஷரியா சட்டங்களினால் வஞ்சிக்கப்பட்டு வருகிறார்கள்.
ஆணுக்கும் பெண்ணிற்கும் பொதுவான தலாக் சட்டம் வேண்டும் என ஆர்வலர்கள் கூறினாலும் அப்படி ஒரு பொதுச் சட்டத்தினை குர்ஆன் வழி உருவாக்கவே இயலாது. அப்படிப் பட்டது நம் அருமை திருமறை.
அவர்கள் உண்மையில் மேம்பட வேண்டும் என்றால் முதலில் பலதார மணம் இத்தா போன்ற ஆண் சார்புநிலை சட்டங்களை அப்புறப்படுத்த வேண்டும். அதற்கான முன்முயற்சிகளை முஸ்லிம்களே மேற்கொள்ள வேண்டும். இன்னும் சொல்லப் போனால் அனைத்து மதத்தாருக்கும் பொதுவான சிவில் சட்டம் காலத்தின் கட்டாயம். இந்தியா போன்ற ஒரு நாட்டில், ஆயிரக்கணக்கான சாதிகள், நெறி முறைகள். இந்து மதத்திற்குள்ளேயே மலைக்கவைக்கும் அளவு வேறுபாடுகள், முரண்பாடுகள். இது போக பல்வேறு மதங்கள் இந்தப் பின்னணியில். பொது சிவில் சட்டம் சாத்தியமா என்பதும் நியாயமான கேள்வி. ஆனால் அந்த இலக்கை நோக்கியே சமூகம் நகரவேண்டும் என நான் கருதுகிறேன்.
தலாக்கைப் பொறுத்தவரை அது பல முஸ்லிம் நாடுகளில் ஏற்கெனவே தடை செய்யப்பட்டிருப்பதும் உண்மையே. தலாக் விடயத்தில் மட்டும் அல்லாது பல அடிப்படை விடயங்களும் முஸ்லிம் நாட்டுக்கு நாடு மாறுபடுகிறது.
இஸ்லாமிய சட்டம் என்பதே மனிதர்கள் மனிதர்களுக்காக இயற்றி, மாற்றி திருத்திக் கொள்ளும் மனித சட்டங்கள் அல்ல என்பது அனைத்து முஸ்லிம்களின் அசையா நம்பிக்கை! ஸலாத்/தொழுகை ஸவ்ம்/நோன்பு ஜகாத்/2.1/2% வருடாந்திர வரி போன்றே நிக்காஹ் /திருமணம்/தலாக் / விவாகரத்து/ மஹர் எனும் படுக்கைக்கூலி போன்றவைகள் அதுப்போலவே. தர்ஹா எனும் சமாதி வழிபாடுகள் இவை அனைத்தும் நாட்டுக்கு நாடு மாற்றம், தடை என்றுண்டு
இப்பின்னணியில், அனைத்து தரப்பினரையும் கலந்தாலோசித்து, பெண்கள் உரிமையைப் பாதுகாத்து, அதே நேரம் முஸ்லீம் சமுதாயம் தேவையில்லாத சிக்கல்களுக்கு ஆட்படாத வகையில், முத்தலாக் தடுப்பு மசோதாவினை திருத்தி அமைக்க வேண்டும்.
ஆனால் அத்தகைய கலந்தாலோசனைகளுக்கு எந்த வகையிலும் தயாரில்லை என்பதையே பாராளுமன்ற மாநிலங்களவையில் இம்மசோதாவின் அறிமுக நாளில் நடந்த விவாதம் உணர்த்தியது. காங்கிரஸ் கட்சியின் ஆனந்த் சர்மா, உள்ளிட்டோர், இம்மசோதாவை பாராளுமன்ற நிலைக் குழுவுக்கு அனுப்ப வேண்டும் என்ற கோரிக்கையை வைத்தபோது, மத்திய அமைச்சர்கள் ரவிசங்கர் பிரசாத் மற்றும் அருண் ஜெய்ட்லி, நிலைக்குழுவுக்கு அனுப்ப நேரமில்லை. உடனடியாக விவாதத்துக்கு எடுத்துக் கொள்ளப்பட்டு சட்டமாக்கப்பட வேண்டும் என்றார்கள்.
நிலைக்குழுவுக்கு அனுப்பாமல், இதை சட்டமாக்கக் கூடாது என்று காங்கிரஸ் கட்சியின் குலாம் நபி ஆசாத் வாதாடியபோது, அருண் ஜெய்ட்லி, காங்கிரஸ் கட்சியை பெண்களின் முன்னேற்றத்துக்கு எதிரான கட்சி என்று குற்றம் சாட்டினார். பெண்களின் முன்னேற்றத்தில் உண்மையிலேயே அக்கறை இருந்தால், பாராளுமன்றத்தில் பெண்களுக்கான இட ஒதுக்கீடு மசோதாவை அறிமுகப்படுத்தாமலேயே இருப்பது ஏன் என்று காங்கிரஸ் பதிலடி கொடுத்தது.
இந்த மசோதாவை எப்படியாவது சட்டமாக்க வேண்டும் என்பதில் பாஜக தீவிரமாக இருப்பதை உணர முடிகிறது. பாராளுமன்றக் கூட்டத் தொடர் முடிந்து விட்டதால், அடுத்த கூட்டத் தொடருக்கு முன்பான இடைப்பட்ட காலத்தில் அவசரச் சட்டமாகக் கூட இதை கொண்டு வர வாய்ப்பு உள்ளது என்றும் ஒரு கருத்து நிலவுகிறது.
ஆனால் அப்படியெல்லாம் ஒரு விபரீத முடிவை பாஜக எடுக்காது என்று நம்புவோம். அனைத்து தரப்பினரின் கருத்துக்களையும், பாராளுமன்ற நிலைக் குழு கணக்கில் எடுத்துக் கொண்டு, ஒரு நியாயமான சட்டம் இயற்றப்படும் என்றும் நம்புவோம்.
(குறிப்பு: அகில இந்திய முஸ்லிம் தனியார் சட்ட வாரியம் வெளியிட்டுள்ள மஜ்முஆ குவானைன் இஸ்லாமி (இஸ்லாமிய சட்டங்களின் தொகுப்பு) Compendium of Islamic Laws என்கிற நூலில் நிகாஹ், தலாக், இத்தா,ளிஹார், லிஆன், ஈலா, குளா, ஃபஸ்க்கே நிகாஹ், ஹிபா, வஸிய்யத், வாரிசுரிமை, வக்ஃப் போன்ற எல்லாவற்றுக்கும் சட்டவிளக்கங்களும் தரப்பட்டிருக்கின்றன. அகில இந்திய முஸ்லிம் தனியார் சட்ட வாரியத்தின் முகவரி : 76/A okhla main market Jamia Nagar, New Delhi 110 025 Tel: 26322991)
(முகநுலில் இஸ்லாமிய சமூகம் குறித்து பல்வேறு செய்திகளை பதிந்துவரும் சாதிக் சமது தன்னை ஒரு முன்னாள் இஸ்லாமியர் என்று அழைத்துக்கொள்கிறார்.)
கருத்துகள்
கருத்துரையிடுக